პარტნიორები
მეგობრები
მთვლელები
ტესტ-დრაივი Subaru Impreza :თამაში უკუღმა
რა არის თქვენთვის Subaru? ნახევარზე მეტი იტყვის, რომ ესაა ავტოსპორტი, მძლავრი მანქანები, სრული ამძრავი და ტურბინიანი ძრავები. მართალია. იაპონური კომპანია Subaru -ს დამსახურებები ავტოსპორტის დარგში შეუფასებელია.
ავტომობილები კუროს თანავარსკვლავედით ემბლემაზე ყოველთვის განთქმული იყვნენ მძლავრი ოპოზიტური ძრავებით, დახვეწილი მართვადობით და ”პატიოსანი” სრული ამძრავით. ინჟინრებმა შეძლეს ყველა ეს კომპონენტი, მხოლოდ უფრო სახალხო სახით, გადაეტანათ მასობრივ მოდელებზე, რათა ყველას შეძლებოდა თავით გადაშვებულიყო ამ განყენებულ და განუმეორებელ სამყაროში, რომელსაც Subaru ქვია.
Subaru Impreza -ს პირველი თაობა 1992 წელს გაჩნდა. ახალი მოდელი აიგო Legacy -ს მოდიფიცირებულ პლატფორმაზე და უკვე ერთ წელიწადში შეცვალა იგი რალის მსოფლიო ჩემპიონატზე. 1994 წლის მოგებათა სერიის შემდეგ კომპანიის ხელმძღვანელობამ გადაწყვიტა Impreza WRX STi -ს მასობრივი წარმოება, რომელიც ”ტექნიკით” მიახლოვებული იყო Subaru World Rally Team-ის საბრძოლო ბოლიდთან.
2007 წლის აპრილში ნიუ-იორკის საერთაშორისო ავტოგამოფენაზე Subaru Impreza -ს მესამე თაობის პრემიერა შედგა, რომელიც ახალ ნიშანსვეტად იქცა მოდელის ისტორიაში.
პირველ რიგში, გამოჩნდა ”ჰეჩბეკის” ტიპის ძარა ( გადაწყდა უნივერსალზე უარის თქმა), გარდა ამისა მოდელმა მიიღო ძარის სრულიად ახალი დიზაინი და სალონი. ნახევარი წლის შემდეგ გაიმართა Subaru Impreza -ს ევროპული პრემიერა ”სედანის” ტიპის ძარით. მეორე თაობის მოდელთან შედრებით Impreza 2008 115 მმ-ით დაგრძელდა, თვლების ბაზა კი, 95მმ-ით გაიზარდა. უსაფრთხოების მოსაზრებების გამო უარი ითქვა კარებზე ჩარჩოების გარეშე.
Subaru Impreza -ს პორტული მიღწევებისა და მძლავრი მოდელების პოპულარობის მიუხედავად, ტესტისთვის შეირჩა Subaru Impreza -ს აბსოლიტურად სამოქალაქო ვერსია ”სედანის” ძარით , 1,5 ლიტრიანი უამბიციო ძრავით და გადაცემათა ავტომატური კოლოფით.
ეს მანქანა სრულიად უპრეტენზიო საშუალო სტატისტიკური სედანის შთაბეჭდილებას ტოვებს. არც ძარის სპორტული ელემენტები, არც 17 დუიმიანი დისკები, არც ტურბინის გამაგრილებელი- საფირმო ჭრილი კაპოტზე- ყველაფერი უბრალო და ლაკონურია.
სალონში მოწყენილობაა-რუხი და მძიმე პლასტმასის წინა და გვერდითი პანელები, კლიმატური დანადგარის და აუდიომოწყობილობის უბრალო გაფორმება, თუმცა არის რაღაც ახალიც. განსაკუთრებით თვალში საცემია ჩანართები ”ტიტანის” სტილში, რომლებითაც ტორპედო და კარების პანელებია მოპირკეთებული. მოწყობილობათა პანელსაც არაუშავს- ყველაფერი გასაგებად და თავის ადგილზეა. აწყობის ხარისხიც შესანიშნავია, თუმცა უსწორმასწორო გზაზე პლასტმასის დეტალები ”თამაშობს” და ისმის ჩუმი ჭრიჭინი, რაც ავტომობილს რომლის ოდომეტრზე სულ რაღაც 1500 კილომეტრია, არ ეპატიება. მოსახერხებელი საჭე, რომელიც ორ სიბრტყეში რეგულირდება და მართვის ყველა მნიშვნელოვანი კვანძის სიახლოვე აკომპენსირებს დიზაინის მოწყენილობას.წინა სავარძლები მოსახერხებელია, მაგრამ სულ ესაა და ეს. ერგონომიკული გათვლებიდან შეიძლება აღინიშნოს პატარა და მოუხერხებელი ხელის ჩამოსადები.
თუ წინა სავარძლებზე კალათბურთელები არ სხედან, უკანა სავარძელზე სამი ზრდასრული ადამიანი დაეტევა, თუმცა თავი კომფორტულად რომ იგრძნონ ერთს აუცილებლად მოუწევს გადმოსვლა. საბარგულის მოცულობის გაზრდა შესაძლებელია უკანა სავარძლების ხარჯზე, რომლებიც სპეციალური სახელურის მეშვეობით იკეცება პროპორციით 60:40.
1,5 ლიტრიანი, 107 ცხ.ძ სიმძლავრის ჰორიზონტალურ-ოპოზიტური ძრავი და Sportshift ტიპის 4-დიაპაზონიანი ავტომატური ტრანსმისია გაქანების საკმარის დინამიკას ვერ გვპირდება. საქმეში ყველაფერი ბევრად უარესად ჩანს. აქსელერატორის სარეტფულზე მკვეთრ დაჭერას მოყვება მრავლისმეტყველი პაუზა, ახალი Impreza მხოლოდ ამის შემდეგ იწყებს მოძრაობას. 230 ცხენის ძალიან Impreza -ზე ანალოგიური გადაცემატა კოლოფით მსგავსი მოვლენა არ შეინიშნება, ე.ი. საქმე ძრავშია.
მოძრაობისას ”კოლოფი” რბილად და დროულად რთავს საფეხურებს, მკვეთრი გასწრებისთვის ძრავის პოტენციალი არასაკმარისია, ამიტომ მანევრი წინასწარ ყურადღებით უნდა გათვალოთ. ”ავტომატის” სპორტულ რეჟიმზე გადართვისას სიტუაცია ცოტათი იცვლება, ”კოლოფი” საჭირო გადაცემას ბოლომდე იჭერს, თუმცა აქსელერატორის ჩაჭერისას 1,5 ლიტრიანი ძრავი უფრო ღრიალებს , ვიდრე მიდის. თუმცა მეორემხრივ საბაზო ვერსია შეიქმნა არა რბოლისთვის, არამედ წყნარი, ეკონომიური გადაადგილებისთვის ქალაქში. ამ ამოცანას მანქანა წარმატებით ართმევს თავს. შესაბამისად საწვავის ხარჯიც ნაკლებია-წყნარი სიარულით ის 9.0 ლიტრს არ სცილდბა ას კილომეტრზე.
ამორტიზატორული, ნაცადი კონსტრუქციის წინა დაკიდება უცვლელი დარჩა. უკანამ კი ცვლილებები განიცადა. მიუხედავად იმისა ,რომ მწარმოებელი მის სქემას ორბერკეტიანს უწოდებს, სინამდვილეში ის თანამედროვე მრავალბერკეტიანია. დაკიდების სვლები გაიზარდა, რის გამოც გაიზარდა დახრა მოსახვევებში და მცირე ქანაობაც შესამჩნეველია. სამაგიეროდ გზის მცირე ხარვეზებს Impreza ვერ ამჩნევს, ხოლო უსწორმასწორობები წარმატებულად შთაინთქმება. სავალი ნაწილის კომფორტული ცვლილებებისა და 15 დუიმიანი (საბაზო კომპლექტაციაში) თვლების მიუხედავად, Subaru Impreza კვლავ საუცხოოდ იმართება. ის მოხვევის ტრაექტორიაში შესანიშნავად ჯდება, რამეთუ საბაზო მოდელშიც კი, Subaru-ს საფირმო სიმეტრიული სრული ამძრავი არავის გაუუქმებია. მოსახვევის მოცურების ზღვარზე გავლის დროსაც კი, საკმარისია მოვუმატოთ აქსელერაციას, რომ უკანა შიდა საბურავი ავტომობილს სწორ ტრაექტორიაზე დააბრუნებს. მკვრივი საჭეც ტრადიციულად ზუსტია, რამეთუ გააჩნია შესანიშნავი უკუკავშირი, რაც საგზაო მდგომარეობას სრულად გადასცემს მძღოლის ხელებს. მუხრუჭებიც არ იძლევა საყვედურის საფუძველს
საბაზო Impreza -მ აჩვენა რომ Subaru -ში კვლავ აწყობენ არამარტო დამუხტულ ბოლიდებს ფეთქებადი ტემპერამენტით თავგადადებული მრბოლელებისთვის, არამედ წყნარ ეკონომიურ ავტომობილებსაც, შესანიშნავი მართვადობით და კომფორტით. ხოლო სრული ამძრავი და იდეალურად აწყობილი დაკიდება მფლობელს ნებისმიერ გზაზე თავდაჯერებულობის საშუალებას აძლევს.